NguLulama kaSozathini
UMzantsi Afrika — UMongameli weRiphabhlikhi yaseMzantsi Afrika, uMnu Cyril Ramaphosa, uchonge uMnu Buti Kgwaridi Manamela njengoMphathiswa weMfundo ePhakamileyo nokuQeqeshwa ngokwezeMisebenzi. Eli nyathelo layamene neCandelo 91(2) loMgaqo-siseko weli.
Esi sigqibo siza emva kokususwa kuka Gqirha Nobuhle Nkabane ngebholo lokuchongwa kwebhodi yeSector Education and Training Authorities (SETA) nalapho kwabonakala uluhlu lwabatyunjwa aboyamene nombutho olawulayo i-African National Congress (ANC). Ukanti uMnu Manamela usebenze njengoSekela-Mphathiswa kwiSebe leMfundo ePhakamileyo ukusukela oko kwasekwa ulawulo lwekhabinethi yoburhulumente besixhenxe. Ngoku uthatha uxanduva oluza nokuphucula imfundo ephakamileyo kweli.
Kwangaxeshanye, uMongameli Ramaphosa wenze olunye utshintsho ngokuchonga uGqirha Nomusa Dube-Ncube njengoSekela-Mphathiswa weMfundo ePhakamileyo nokuQeqeshwa ngokwezemisebenzi, ngokweCandelo 93(b) loMgaqo-siseko.
uGqirha Dube-Ncube, unamava okukhokela kurhulumente, ukhe wabamba njengoMphathiswa weMicimbi yeNkxaso-noLawulo lwemicimbi yeMveli (Cooperative Governance and Traditional Affairs) Waze waphinda wabuya waba yiNkulumbuso yePhondo iKwaZulu-Natal. UMgaqo-siseko, ngokweCandelo 93(b), uvumela uMongameli ukuba onyule abantu ababini kuphela ukuba babe ngooSekela baphathiswa ngaphandle kweNdlu yoWiso-mthetho.
Ezi nguqu zibonisa ukuzimisela kukaMongameli Ramaphosa ukuqinisekisa ukuba icandelo leMfundo ePhakamileyo nokuQeqeshwa ngoMsebenzi likhokelwa ngabantu abanamava nabazibophelele ekuphuhliseni ikamva labafundi baseMzantsi Afrika “itshilo iofisi kaMongameli.”
@icamagunews
