NguLulama kaSozathini Umfanekiso: Icamagu Studios
ISebe lezeMidlalo, ubuGcisa neNkcubeko likhuphe kwisaziso sikarhulumente (gazette) utshintsho olusemthethweni lwamagama eendawo nezixeko eMzantsi Afrika, nto leyo ephawula ukuphela kwegama elithi East London kunye neGraaff-Reinet phakathi kwamanye.Olu tshintsho luphakathi kweenguqu ezingamashumi amabini ananye (21) ezityikitywe lisebe ngoLwesihlanu, umhla wesithandathu (6) kweyoMdumba 2026 kwaye luqinisekisa iingxelo zangaphambili zokuba olu tshintsho belusondele.
Ngokutsha, i-East London ngoku iza kubizwa ngokusemthethweni ngokuba yi **KuGompo City**, emva kokuba urhulumente weMpuma Koloni ebhengeze ngo-2024 ukuba uza kuqhuba lo mbandela wokutshintshwa kwegama.
Iintlanganiso kunye neengxoxo zoluntu malunga nolu tshintsho zabanjwa eQonce, eMdantsane nakwiindawo ezininzi eziselunxwemeni phakathi kweyoKwindla noTshazimpuzi ka-2025, njengoko kufunwa ngumthetho phambi kokuba izicelo zidluliselwe kumagunya kazwelonke.
Ngaphambili, utshintsho lwegama ukuya kuKuGompo lwalukhe lwaliwa ngenxa yokuba sele kukho idolophu encinci enelo gama kweli phondo. Le ngxaki kuthiwa isonjululwe ngokongeza igama elithi “City” ukuze kuhlukaniswe.Ngokunjalo, idolophu enembali yase **Graaff-Reinet**, eyona yesine indala eMzantsi Afrika, ngoku iza kubizwa ngokuba yi **Robert Sobukwe**.
Iinzame zangaphambili ngo2024 zokutshintsha eli gama zaye zahlangabezana nokuchasana okukhulu kuluntu, de iBhunga leSizwe lamaGama lema kancinci. Nangona kunjalo, ngelo xesha, ibhunga lephondo lacacisa ukuba lo mba wawungagqitywanga ngokupheleleyo, yaye utshintsho lwalwaliwe lisebe ngenxa “yokunqongophala kolwazi”, olunokuthi luqokelelwe kwizicelo ezizayo.
IGraaff-Reinet yasekwa ngo-1786, yathiywa ngegama likaRhuluneli waseKapa ngelo xesha, uCornelis Jacob van de Graaff, kunye nenkosikazi yakhe uReinet.Igama elitsha, u **Robert Sobukwe**, libhekisa kumnkqonkqozi wenkululeko nowayengumseki wePan Africanist Congress (PAC), nowadlala indima ebalulekileyo kumzabalazo wokulwa ucalucalulo.
Ezinye iinguqu zamagama ezixeko zibandakanya **iBishop Limba**, eyayisaziwa ngokuba yiAdendorp, kunye **neXamdeboo**, eyayisaziwa njengeAberdeen.
