Imifanekiso: SAPS
Ibali: NguLulama Mpahla
Kugujululwe inqwaba yeziyobisi kuphendlo oluqhutywe ngamapolisa kuhola wendlela uN1 eLaingsburg, eNtshona-Kapa. Ngolwesithathu umhla wamashumi amabini anesixhenxe (27) kweyoKwindla ngesithuba secala emva kwentsimbi yethoba ebusuku, amapolisa amisa isigadla ukwenza uhlolo olufutshane. Amapolisa aye anesikrokro kwindlela umqhubi aziphethe ngayo ngethuba emiswa, ze andula enza uphendlo olugcweleyo kwisigadla so ahamba ngaso.
Amapolisa aye afumana iziyobisi ezithekelelwa kwixabiso lezigidi ezisixhenxe zeerandi (R7 million) kwimarike yasekuhlaleni, zipakishwe ngasemva kwesi sigadla. Zilikhulu linamashumi mane anesihlanu (145 000) iipilisi zohlobo lweMandrax eziya zafunyanwa waze umqhubi wesigadla wavalelwa.
Ityala liye lavulwa lisebe elikhethekileyo eliphanda ngeziyobisi eNtshona Kapa. Umqhubi yena nominyaka inamashumi mane anesine (44) kulindeleke ukuba avele kwinkundla kaMantyi yaseLaingsburg ngomhla wesibini kuTshazimpunzi walonyaka.
