Ngu Lulama kaSozathini
Imifanekiso: Zulu Royal House
EThekwini, 09 Tshazimpuzi 2025 – UKumkani uMisuzulu KaZwelithini ubhengeze ukuchonga iinkokheli ezibalulekileyo kubukumkani bakwaZulu ngenjongo yokuqinisa ulawulo nokuphucula unxibelelwano lwesizwe sakhe. Kwabo batyunjiweyo yiNkosi Yesizwe SakwaButhelezi, iNkosana uNtuthukoyezwe Zuzifa Buthelezi, unyulwe njengoSihlalo weBhunga leKumkani leSizwe sakwaZulu, logama iNkosana uThulani Zulu echongwe njengoMthetheleli Osemthethweni woSapho Lwasebukhosini nesizwe sakwaZulu.
INgonyama ikuqinisekise oku ngexesha lomsitho obubanjelwe eThekwini ngomhla wesithoba kuTshazimpuzi 2025. Eli nyathelo lithathwa njengenxalenye yenkqubo yokuqinisa nokulungisa ulawulo lwesizwe phantsi kobunkokheli bukaKumkani uMisuzulu. iNkosana Buthelezi uza kusebenza ngokusondeleyo noMphathiswa omkhulu (uNdunankulu) wobukumnkani bakwaZulu, onoxanduva lokuphumeza izigqibo namaphulo ebhunga lakomkhulu. Ibhunga leKumkani liya kusebenza ngendlela engqinelanayo neofisi yabucala yeKumkani.
INkosana uZulu, noyingcaphephe kwezolwazi nomanyano lwesizwe, uza kusebenza njengonozakuzaku osemthethweni wosapho lwasebukhosini kunye neSizwe sakwaZulu. Umsebenzi wakhe ubandakanya ulawulo lwemiyalezo ejoliswe kuluntu, imithetho yenkqubo yesizwe, kunye nokugcina isidima sobukhosi kwinqanaba eliphezulu. INkosana le nayo iza kusebenza ngokusondeleyo neofisi yabucala yeKumkani, iofisi yoMphathiswa Omkhulu (uNdunankulu).
Zombini eziNkosana zithe ziziva ziwongekile kukunikwa eli thuba lokusebenzela ubuKumkani bakwaZulu. Kuza kubanjwa intlanganiso noonondaba kungekudala, apho ezi nkokheli ziya kucacisa ngokupheleleyo imisebenzi yazo kunye neenjongo zazo kulawulo lwesizwe sakwaZulu.
@icamagunews
