01 Tshazimpunzi 2024
nguLulama Mpahla
Iqela elikhethekileyo lenkonzo yesipolisa kweli i-National Task Team ejongene nokuphandwa kwezigameko zokubulawa kwabantu kwiDyunivesiti yakwaNokheleji iFort Hare ngolwasemzini, iphinde yanqakula yavelela abanye abarhanelwa abalishumi elinesihlanu kule mpelaveki yePasika.
Oku kubeke kumashumi amabini anesihlanu (25) inani labarhanelwa abajongene namatyala oyamene nokubulawa kukaPetrus Roets owayejongene nesebe lezothutho kule Dyunivesiti kunye noRichard Vesele owayengumkhuseli wesekela ngqonyela uNjingalwazi Sakhele Buhlungu. Aba barhanelwa bakwabekwa amatyala okuzama ukubulala lo kaBuhlungu kunye nesekela lakhe uRenuka Vithal.
Abarhanelwa abasele bebekwe amatyala ngaphambili ngaba balandelayo: uBongani Peter, Sicelo Mbulawa, Wanini Khuza, Mthobisi Khanyile, Mthobisi Dlamini, Lindokuhle Manjati, Zimele Chiliza, Phelisa Nkonyeni, Thamsanqa Mgotyana kunye noIsaac Plaatjies.
Ukanti aba basandula ukubanjwa bacholacholwe kwiindawo eziliqela kulempela veki yepasika esingabalula iindawo ezikumaphondo iGauteng, iMpuma-Kapa, iNtshona-Kapa kunye neKwaZulu Natal. Phakathi kwezinye izityholo abatyatyekwa zona lurhwaphilizo, ubuqhophololo, ukuxhwila, ukubulala kwanokuzama ukubulala.
Kulindeleke ukuba bavele kwinkundla kaMantyi yaDimbaza, eMpuma-Kapa ngoLwesibini umhla wesibini ukuTshazimpunzi 2024. Ephawula ngesi sehlo uMkomishinala Jikelele wamapolisa uGeneral Fannie Masemola uwuqhwabele izandla umsebenzi weligqiza lamapolisa watsho esithi liseza kuqhubekeka lisenza umsebenzi walo ngaphandle kwedyudyu kwaye ngokungena mkhethe. Kulindeleke ukuba uMkomishinala kunye noMpathiswa wesipolisa uGeneral Bheki Cele babe yinxalenye yenkundla ngoLwesibini.
@icamagunews
