IKnysna(Entshona-Kapa) — Njengokuba unyulo loorhulumente basekhaya luka-2026 lusondela, uMasipala weSithili saseGarden Route (GRDM) ubhengeze ukuba awuzukuyinyamezela nangayiphi na indlela intshukumo yobundlobongela, waza wacela ukuba kuphandwe ngokunzulu iimeko ezijikeleze ukubulawa kabuhlungu kowayesakuba nguSodolophu waseKnysna, nobenguCeba weWadi 8, uAubrey Ndoda Tsengwa, oneminyaka engama-48 ubudala.
UTsengwa udutyulwe wabulawa eJoodsekamp, eKnysna, ngorhatya lwangoLwesithathu, umhla we-19 kweyeThupha 2026. Abacuphi bePhondo abakwicandelo eliphanda ulwaphulo-mthetho olunobuzaza nobundlobongela, iSerious and Violent Crime Unit, ngoku baphanda ityala lokubulala kunye namatyala amathathu okuzama ukubulala emva kwesi siganeko.
Ukubhubha kukaTsengwa kushiye uluntu lwaseKnysna kunye nommandla wonke waseGarden Route lothukile. UMasipala weSithili saseGarden Route uthe ukubulawa kwakhe kudale intlungu kummandla wonke.
Kwingxelo yawo, iGRDM ithe iBhunga layo, abaphathi nabasebenzi badlulisa amazwi ovelwano olunzulu kusapho, izihlobo kunye noogxa bakaTsengwa.
“Sidlulisela amazwi ethu ovelwano ngokusuka entliziyweni kubunkokeli nakubasebenzi bakaMasipala waseKnysna, kwanabantu baseKnysna, abaphulukene nommeli woluntu ozinikeleyo kunye nenkokeli yoluntu,” utshilo umasipala.
IGRDM iphinde yakugxeka kabukhali konke ukubonakala kobundlobongela yaza yaxhasa uphando olunzulu nolucokisekileyo malunga neemeko ezikhokelele kwesi siganeko sibuhlungu.
“IGRDM iyazigxeka zonke iintlobo zobundlobongela kwaye ixhasa uphando olunzulu malunga neemeko ezijikeleze esi siganeko sibuhlungu,” yatsho ingxelo.
UTsengwa wayekhe wasebenza njengelungu leBhunga loMasipala weSithili saseGarden Route emva kokungeniswa ngokusesikweni ngomhla woku-1 kweyeDwarha 2018. Wasebenza kwiBhunga leSithili de warhoxa kwisikhundla sakhe ngomhla we-18 kweyoMqungu 2023.
Njengokuba unyulo loorhulumente basekhaya lucwangciselwe umhla we-4 kweyeNkanga 2026, uMasipala weSithili saseGarden Route ubize amaqela ezopolitiko, abameli boluntu, abaxhasi bawo kunye noluntu ngokubanzi ukuba bagcine unyamezelo, intlonipho kunye nokuzibandakanya kwidemokhrasi ngendlela enoxolo.
Umasipala uthe igalelo likaCeba Tsengwa kurhulumente wasekhaya nakwiindawo awayezisebenzela malikhunjulwe ngesidima nangentlonipho.
Lo masipala uphinde wanqwenelela usapho nezihlobo zakhe amandla, intuthuzelo noxolo ngeli xesha linzima.
UMasipala waseKnysna nawo ulile nosapho lwakaTsengwa, uchaza ukubhubha kwakhe njengento eyothusileyo nelahleko enkulu kakhulu kuluntu.
USodolophu waseKnysna, uThando Matika, uthe uluntu luphulukene nomntu obesaziwa kakhulu, ehlonitshwa, kwaye ezimisele ekukhonzeni abantu.
“Silusizi kakhulu ngokusweleka kukaCeba weWadi 8, uAubrey Ndoda Tsengwa, owayengumntu owaziwayo nohlonitshwayo kuluntu lwaseKnysna,” utshilo uMatika.
Ukubulawa kukaTsengwa kuza ngexesha apho ilizwe lilungiselela unyulo loorhulumente basekhaya, nto leyo ephinde yabeka phambili inkxalabo malunga nokhuseleko lweenkokeli zoluntu, oosopolitiki kunye nabameli babantu.
Amapolisa ayaqhubeka nophando, kwaye uluntu lulindele ukuba abo banoxanduva ngokubulawa kukaTsengwa kwakunye nokuzama ukubulala abanye abantu baziswe phambi komthetho.
