Ibhalwe yi Icamagu News
Kwisenzo esibonisa uthando nolwakhiwo loluntu, igqwetha elaziwayo uSiyabulela Pindani ubonakalise ukuba impumelelo inentsingiselo ngakumbi xa isetyenziswa ukunceda abanye. Nangona ephumelele kakhulu kwicandelo lezomthetho, uPindani ukhethe ukusebenzisa ixesha lakhe leeholide zasebusika ukuxhasa ulutsha ngokusingatha ukhuphiswano lwebhola ekhatywayo eTsholomnqa kufutshane nakuGompo.
Olu khuphiswano beluququzelelwe ngentsebenziswano neMalcomess Mgabela Local Football Association (LFA), apho amaqela olutsha avela kwiindawo ezahlukeneyo athe athatha inxaxheba. Injongo ibikukukhuthaza ulutsha ukuba luzibandakanye kwizinto ezilungileyo, luphuhlise izakhono zalo, kwaye luphephe izilingo ezingalunganga.
Amaqela athe akhuphisana ngenkuthalo efuna ukuphumelela amabhaso, apho iqela eliphumelele lifumene iR4000 logama eliphume kwindawo yesibini lifumene iR2000. Kwi-final ebishushu nenomdla, iYoung Destroyers FC iphumelele ngokoyisa iTry Again FC, eyona iqela lifumene indawo yesibini.
UMzi Mpani, ongumkhokeli weMalcomess Mgabela LFA, uvakalise umbulelo wakhe:
“Sibulela kakhulu kuAdvocate Pindani ngokuzinikela kwakhe kuphuhliso lolutsha. Olu khuphiswano lunike abantwana bethu ithemba, inkuthazo, kunye neqonga lokubonisa italente yabo. Intsebenziswano enje yomeleza uluntu lwethu.”
Omnye umdlali oselula naye uthe:
“Olu khuphiswano lubalulekile kuthi. Lusigcina kude neengxaki kwaye lusinika into esijolise kuyo. Siyambulela uAdvocate Pindani ngokusixhasa nokukholelwa kumaphupha ethu.”
Isenzo sikaAdvocate Pindani sibonisa ukubaluleka kokubuyisela eluntwini. Ngokuxhasa ezemidlalo, akancedi nje ukuphuhlisa italente kodwa ukwakha ikamva eliqaqambileyo kulutsha lwaseTsholomnqa.
Njengoko ukhuphiswano luphela, impembelelo yalo iza kuqhubeka ixesha elide, ishiya umyalezo wokuba inkxaso noluntu lunamandla okutshintsha ubomi.
