Umbhaleli Wethu!
Iimifanekiso: Ithunyelwe
Kubhubhe abantu abasixhenxe (7) kwaze kwangxwelerheka isithoba (9) kwingozi equka isithuthi sohlobo lweToyota Quantum kunye neloli. Le ngozi yenzeke kumajiko jiko aseMthentu kuhola wendlela uN2 ekuseni ngoMgqibelo umhla weshumi elinesibini (12) kweyeDwarha. Kuvakala ukuba iQuantum le ibisuka eMonti isiya eLibode ngeli lixa iloli ibisiya kwicala langaseMonti. Ezi zithuthi ziye zangqubana okweenkunzi zeegusha ze abantu abasixhenxe babhubha ngoko nangoko ngeli lixa abanye baye bonzakala. Ukanti abonzakeleyo baye babalekiselwa kwisibhedlele iMthatha General Hospital.
Kwenye ingozi eyehle ePort Shepston nechaphazela abakhweli baseMpuma Kapa ngoLwesihlanu, bane (4) abantu abathe babhubha ngexesha ibhasi yabo ibhukuqa kwakuhola wendlela uN2. Kuvakala ukuba lebhasi ibikhwelise abantu ebebesuka eFlagstaff besiya eThekwini. Abasindileyo bathi umqhubi uye watsalela umnxeba inkampani le yebhasi eyazisa ngevili elinengxaki nekulilo eliye ladala ingozi ethubeni. Ngamashumi amabini anesithandathu (26) aye alimala kulengozi. Abonzakeleyo baye babalekiselwa kwisibhedlele esikufutshane.
Amagosa ezothutha eMpuma-Kapa avakalise ukuba lebhasi ikhe yahlolwa ngaphambili kwaye ibingekho selungelweni lakuhamba ezindleleni kwaye nomqhubi ebengenazo impepha ezigunyazisa ukuba akwazi ukuthutha abantu. Umqhubi walebhasi useluvalelweni ukwabekwe izityholo zokubulala ngaphandle kweenjongo. Amagosa esebe lezothutho KwaZulu Natal athe azakuzakuzela ukuba lomqhubi kunye nabaphathi balenkampani bajongane nezityholo zokubulala nezokuzama ukubulala.
UMphathiswa wezothutho eMpuma-Kapa uMnu Xolile Nqatha wenze amazwi ovelwano kuzo zonke iintsapho ezibandakanyekayo kwezi zithwakumbe zezingozi.
@icamagunews
