NguLulama kaSozathini
27 eyeThupha 2024
Inkonzo yosasazo yenye indlela abalulekileyo ukusasaza ulwazi kunye nezinto eziluncedo eluntwini. Amagqiyazana amabini aselula phantsi kwesikhululo sosazo esizinze kwisixeko saseBuffalo City, Icamagu Radio eMonti asebenzise lenyanga yamanina ukukhankanya imiceli-mngeni eliqela kumanina aselula. Sindwendwele inkqubo yalamagqiyazana nesasazwa rhoqo ngoLwezibini phakathi kwentsimbi yokuqala emini ukuya kweyesithathu malanga. Esi sikhululo nesisasaza ngomnatha sibhiyozele inyanga yamanina ngokunika ithuba amanina aselula ukuba asebenzise inkonzo yosasazo njengesixhobo sokulwa nodushe olujoliswe kumanina nabantwana.
Umbhexeshi oyintloko yalenkqubo uSisanda Jack uthe basebenzisa lenyanga yamanina ukulwa nokuxhatshazwa kwamanina nabantwana. Inkqubo le inika inkxaso kulomaxhoba athe achaphazeleka kwiziganeko ezininzi zodushe kunye nempatho mbi ngakumanina nabantwana. Sele zizininzi izehlo ezihambisa umzimba ezifana nokubulawa kabuhlungu kwamanina aselula ngamaqabane awo. Kungako apha kwisikhululo siye sanenkqubo ekhuthaza ukuba amanina aselula akwazi ukuqaphela kwangethuba xa ekuthando olunobungozi – “utshilo uJack.
UNasiphi Mabusela ongumsasazi kulenkqubo nokwangumfundi kwidyunivesiti yaseWalter Sisulu uthi enye yezinto eziyingxaki kumanina aselula ngumkhumba wokusebenzisa iziyobisi nodala inkubazeko nempilo enkenenkene kuwo. Iziyobisi sesona sidodobalisi sengqondo kubantu abatsha nesitshabalalisa ikamva labo. Phakathi kwenkqubo zethu sibalula ubungozi beziyobisi kunye nokusela utywala ngokugqithisileyo. UMabusela uthi usebenzisa unyaka wakhe wokuqgibela edyunivesiti ukuphuhlisa isakhono sakhe sokuba ngumsasazi kwesi sikhululo kwaye ukwaphakamisa izinga lamanina aselula kwezosasazo.
Le nkqubo yalamanina ithi “Siyakhana” kwaye isasazwa rhoqo ngolwezibini. La manina acele ukuba ulutsha luhlale luphulaphula ukuze lufumane iingcebiso zobomi. Umntu angazi fumanela i-App yesikhululo kuGoogle Play Store okanye aphulaphule ku www.icamagulive.co.za.
