NguLulama kaSozathini
Usomashishini waseDikeni Umnu Mpumelelo Xiniwe (67) uqwengwe zizinja zohlobo lwePitbull wabhubha kwikhaya lakhe eliseDikeni eMpuma Kapa.
Iingxelo zithi ezi zinja zisuke zonda ngaye zamqwenga zamdlakaza ngaphandle kwesizathu. Esi siganeko sehle ngomgqibelo umhla wesibini kweyeNkanga. Kuvakala ukuba umfi ebengena ekhayeni lakhe emva kokupheleka isihlobo sakhe ebesimndwendwele. Kuthiwa ezi zinja ziye zonda ngaye xa kanye egqiba kuvala isango lendlu leyo yakhe. Omnye wosapho ebezama ukusindisa ubomi balengwevu ziye zonda ngaye ezi zinja naye zamdlakaza kodwa wasinda yena.
Eli tyenyana ebelizama ukunceda liye lamrhuqela ngaphandle kwekhaya umfi kodwa besele zimosele waba uyabhubha kanjalo ngenxa yamanxeba omonzakalo. Sele zithande ukwanda iziganeko zokuhlaselwa loluhlobo lwezinja, uninzi lukholelwa ekubeni ezi zinja azilohlobo lokufuywa. Ukanti abanye abantu bakholelwa ekubeni ukufuya ezi zinja kuluncedo ekukhuseleni ikhaya lakho kwaye xa uziphethe ngendlela efanelekileyo azinabungozi.
@icamagunews
